Таржимаи ҳол
Маъмура Эргашева истеъдодли раққоса, талантли балетмейстер, яхши ташкилотчи сифатида кенг жамоатчиликка яқиндан танилган, эл назарига тушган ва шуҳрат қозонган. У «Ўзбекистон халқ артисти» фахрий унвони ва «Меҳнат шуҳрати» ордени соҳибасидир.
Истеъдодли раққоса ва балетмейстер Маъмура Эргашева 1951 йилда Тошкентда туғилган. Тошкент хореография билим юртини ва 1977 йилда Тошкент чет тиллар институтини тугатган.
Ўзбек Давлат «Баҳор» халқ рақс дастасида раққоса сифатида фаолиятини бошлаган бўлса, 1990 йилдан шу дастанинг бадиий раҳбари ва бош балетмейстеридир.
Мукаррама Турғунбоеванинг энг яхши ва садоқатли шогирди бўлган М.Эргашева ўзи ижод этган ва саҳнага қўйган рақсларида устозининг анъаналарини изчиллик билан давом эттирмоқда.
Раққоса "Муножот", "Тановар", "Ларзон", "Фарғона рубоийси", "Лазги", "Бухороча ларзон", "Дунёни асранг", "Кўзларингни яширма", "Шошди-ю кетди", "Роҳат", "Ҳолим сўрма", "Жонон пиёла", "Пилла", "Духтари лола", "Ўн саккиз ёшлигим", "Гулсара рақси", "Маржонларинг", "Дарё тошқин", "Жонон", "Завқим келур", "Ёввойи тановар", "Аста қиёлаб ўтди", "Она", "Доира рақсга чорлайди", "Санама", "Ялла айтайин", "Чоргоҳ", "Хамса" асарларига рақс, "Дилхирож", "Сафти муножот", "Наврўзи ажам" каби ўзбек мумтоз, мақом ва замонавий рақсларни ниҳоятда гўзал, жозиба ва моҳирлик билан ижро этди.
Маъмура Эргашева таниқли балетмейстрлар изидан бориб, "Баҳорим", "Фиғонким", "Сенинг қарашларинг", "Наврўзи ажам", "Гул ва булбул", "Ўйнаса", "Ҳаёли қиз", "Ўзбекистон", "Уч доира рақси", "Бебаҳолардан", "Ялла айтайин", "Сафти муножот", "Бунча гўзал", "Эрта билан тураман", "Бухорача рақс", "Хоразмча рақс", "Билакузук", "Хоразмча қорагул" (композиция), "Эркалаб", "Парвона", "Фарғона гўзали", "Хива гўзали", "Андижон полкаси", қирғизча, қозоқча каби элликдан ортиқ мумтоз, халқ ва жаҳон халқлари рақсларини нозик дид билан саҳналаштирди.
Раққосанинг ижро этган, саҳнага қўйган рақслари баъзан нозик ва майинлиги, баъзан шўх, эркин ва кескин ҳаракатлари, катта жозибаси ҳамда эстетик таъсирчанлиги билан ажралиб туради. Устозлари М.Турғунбоева, И.Оқилова, Г.Измайлова, С.Мушеэва, Г.Маваэва, Ирисметовалардан рақс санъатининг мураккаб ва нозик сирларини муттасил ўрганиш, изчил равишда ўз устида ишлаш, тинимсиз меҳнат, умуман, ўз касбига катта меҳр ва садоқат натижаси ўлароқ истеъдодли раққоса бўлиб етишди.
Маъмура Эргашева тез орада истеъдодли раққоса, талантли балетмейстер, яхши ташкилотчи сифатида кенг жамоатчиликка яқиндан танилди, эл назарига тушди, шуҳрат қозонди. Ўзбекистонда хизмат кўрсатган артистлар Гулнора Низомова, Рушана Султонова, Олима Ёқубова, Розия Қадамбоева ва раққосалардан Елена Тўхтаева, Гулшана Қурбонбоеваларни тарбиялаб вояга етказди.
Маъмура Эргашева 1978 йилда "Доира рақсга чорлайди" номли рақси билан Гаванада бўлиб ўтган Ёшлар ва талабалар фестивалининг совриндори бўлди. 1979 йилдан Ўзбекистон Театр арбоблари уюшмасининг аъзоси. 1983 йилда унга "Ўзбекистон халқ артисти" фахрий унвони берилган бўлса, 1999 йилда "Меҳнат шуҳрати" ордени билан мукофотланди.